ഫിറ്റ്നസ് ഗ്രൂപ്പുമായി ബന്ധപ്പെട്ട ചോദ്യങ്ങളും മറുപടികളും.

പ്രായപൂർത്തിയായവർക്ക്, അതായത് പതിനെട്ട് വയസ്സ് കഴിഞ്ഞവർക്ക് മാത്രമാണ് ഗ്രൂപ്പിൽ പ്രവേശനം. ഉയർന്ന പ്രായപരിധിയില്ല. നിങ്ങൾ എത്ര വയസ്സുള്ള ആളാണെങ്കിലും, അത് 70 വയസ്സോ, 80 വയസ്സോ ഒക്കെ ആവട്ടെ,  ഏത് പ്രായത്തിലും  നല്ല ആരോഗ്യശീലങ്ങളും ഭക്ഷണശീലങ്ങളും നമുക്ക് ആരംഭിക്കാം. വിവിധ ഏജ് ഗ്രൂപ്പുകളിലുള്ളവർ ഇതിനു മുൻപത്തെ ബാച്ചുകളിൽ അംഗങ്ങളായിട്ടുണ്ട്, വിജയകരമായി ഭാരം കുറയ്ക്കുകയും ആരോഗ്യം വർദ്ധിപ്പിക്കുകയും ചെയ്തിട്ടുമുണ്ട്.

ഇവിടെ ശ്രദ്ധിക്കേണ്ട ഒരു കാര്യം, നിങ്ങൾ ചെറുപ്പമോ മധ്യവയസ്സോ,  അങ്ങനെ ഏത് പ്രായത്തിലുള്ള ആളുമാവട്ടെ, കാർഡിയോ വർക്കൗട്ടുകൾ /  റെസിസ്റ്റൻസ് വർക്കൗട്ടുകൾ/

HIIT വർക്കൗട്ടുകൾ, ഡയറ്റ് എന്നിവ ചെയ്യാൻ ആരോഗ്യവാന്മാരാണെന്ന്,അവരവരുടെ ഡോക്ടറോട് സംസാരിച്ച് ഉറപ്പു വരുത്തിയതിനു ശേഷം മാത്രമേ ഈ ഗ്രൂപ്പിൽ അംഗത്വമെടുക്കാൻ പാടുള്ളൂ… 

കാരണം, ചില അസുഖങ്ങൾ, ഉദാഹരണത്തിന് ഹൃദയസംബന്ധമായ അസുഖങ്ങളുള്ളവർ ഒക്കെ പെട്ടെന്നൊരു ദിവസം വർക്കൗട്ട് ചെയ്യാൻ തുടങ്ങിയാൽ പലവിധ അപകടങ്ങൾക്ക് കാരണമാവാം, 

അതു പോലെ തന്നെയാണ് ചില മരുന്നുകൾ കഴിക്കുന്നവരും. ഫിറ്റ്നസ് വർദ്ധിപ്പിക്കാനാണല്ലോ നമ്മൾ ഈ ഗ്രൂപ്പിൽ വരുന്നത്. അതൊരിക്കലുംനമ്മളെ  ഒരു അപകടത്തിലേക്ക് നയിക്കുന്നതാവരുത്. എന്നു വച്ച് എന്തെങ്കിലും ഒരു അസുഖമോ പരിമിതിയോ ഉള്ളവർക്ക് ഒരിക്കലും വർക്കൗട്ടും ഡയറ്റുമൊന്നും ചെയ്യാനേ പറ്റില്ല എന്നല്ല. 

നമുക്ക് വേണ്ട മാറ്റങ്ങളോടെ, ശ്രദ്ധിക്കേണ്ട കാര്യങ്ങളൊക്കെ ശ്രദ്ധിച്ച് ഇതൊക്കെ ചെയ്യാനാവും. എന്തൊക്കെ മാറ്റം വരുത്തണം എന്ന് നിങ്ങളെ കാണുന്ന ഡോക്ടർക്കേ പറയാൻ സാധിക്കൂ...

ഇത് ഗ്രൂപ്പിലേക്ക് വരുന്നതിനു മുൻപ് മാത്രമല്ല, വർക്കൗട്ടും ഡയറ്റും തുടങ്ങിയതിനു ശേഷമാണെങ്കിലും എന്തെങ്കിലും ബുദ്ധിമുട്ട് തോന്നിയാൽ, അപ്പോത്തന്നെ വർക്കൗട്ടും ഡയറ്റും നിർത്തണം. ഡോക്ടറെ ചെന്ന് കാണുകയും വേണം.  അവരവരുടെ സുരക്ഷയുമായി ബന്ധപ്പെട്ട കാര്യമാണിത്,  അതുകൊണ്ട് തന്നെ ഈ സ്റ്റെപ്പുകൾ അത്രക്ക് ഗൗരവത്തിൽ തന്നെ ചെയ്യണം.